المساعد الشخصي الرقمي

مشاهدة النسخة كاملة : قصائد مكتوبة / إصدار صوت الراية


المرهون
02-16-2008, 07:21 PM
صوت الراية

خذ ولائي ..... كربلائي
لو تعبن الرجلين
أوصل زحف لحسين
خذ ولائي ..... كربلائي

مجنون وحبكـ علمني ماساوم واخضع هيهات
هيهات الذله تعاشرني والمات بدربكـ مامات
جم طاغي الحاول يمنعني وارفع رايات الثارات
لبيكـ لحد كطع المنحر صوت الدم يصنع ثورات
في دمائي ..... يا رجائي
أثبت اصول الدين
أوصل زحف لحسين
خذ ولائي ..... كربلائي
لو تعبن الرجلين
أوصل زحف لحسين
خذ ولائي ..... كربلائي

شايل يوم الطف بعيوني وبجفني تنام الاحزان
نتعلم من هذا المنبر نصنع ثوره اعله الطغيان
ملتزمين بهاي الخدمه بس هالخدمه تعلي الشان
وحسين اليرفع خدامه ويخلي الخادم سلطان
في حياتي ..... أو مماتي
وي لهفة الماشين
أوصل زحف لحسين
خذ ولائي ..... كربلائي

مشايه تقصدك انصارك عالعاده ورغم الاخطار
كل كطره السالت من نحرك انشوده بدرب الاحرار
كل دمعه بدربكـ محسوبه وبكل خطوه نصيح الثار
ويتمنه العباس جفوفه من يسمع صوت الزوار
لا ضيفي ..... اين كفي
وينادي دمع العين
أوصل زحف لحسين
خذ ولائي ..... كربلائي

وبدرب لطف لاحت رايه رفت بأكثر من تصريح
تهتف لبيكـ وثار الله وين تميل يهب الريح
رايه وجف حيدر لازمهه من اطيح الكاع اطيح
اصغي واسمع صوت الرايه وينكـ ها يالمهدي تصيح
شبل حيدر ..... حين يظهر
وينادي بالضلعين
أوصل زحف لحسين
خذ ولائي ..... كربلائي

مولاي بخدمة زوارك صارت محسوده الخدام
كل ظن الظالم يرهبني من صدر حكم الاعدام
اتلكه الزاير بدموعي هالك رموشي تغطه ونام
أتشرف بتراب اجدامكـ وصفه اترابكـ للآلام
قطع نحري ..... تاج فخري
وينه المنعني وين
أوصل زحف لحسين
خذ ولائي ..... كربلائي

من ابعيد لقبرك امشي واسبح من دمعي المسفوح
واسمع صوت يجر بروحي وجف مكطوع هناك يلوح
يستقبل زينب والعيله والموعد يم المذبوح
ونواسي السجاد بصبره ونداوي الكلب المجروح
صاح قلبي ..... اي وربي
لو بالعمر يومين
أوصل زحف لحسين
خذ ولائي ..... كربلائي

المرهون
02-16-2008, 07:22 PM
ذكريات العقيلة

انه زينب وانته راعي الرايه من السبي يابه الفضل شجايه
من السبي يابه الفضل شجايه

عالقبر خويه ارد اصب سيل الدموع يبن ابوي ونار تحرق بالضلوع
هذا راسكـ جبته وايتامكـ تلوع انهض لزينب يحامي الثايه
اشكي ياعباس نكبات الزمـــان ياربيع الخوه يافيض الحنـــان
انسبي ووياي راسكـ عالسنـــان ميسره وكل يوم اطوف ولايــــه
ياكفيلي بعــــزك وظلكـ اجيت شـلون للشام بيسر تالي مشيت
خاف ماتدري يعبـــاس انسبيــت جيت اخبــرك للكـــبر عنايه

خويه تعذرني ولو قاسي العتاب بس تره اختك شافت الوان العذاب
جفني ماغمض ابد من المصاب من انهدم ركني عله المسنايه
من اهدم ركني بمصابكـ بالكفيل لني وحدي محيره وبس العليل
منين مااعد لهه ابو فاضل تميل والضعن صار الشمر حدايه
يحدي بيه وانتخيكـ بلوعتي وتسمع العدوان هضمي ونخوتي
خويه وتجاوبني بسب اخوتي وبيه حاطت شامتين اهوايه

خويه ويه الروس عندي ذكريات ويانه طول الدرب ظلن ماشيات
وانه كل راس الاشوفه عله القناة بمسرعه عندي علم ودرايه
انظر لفتية عقيل عله النصول شاخصات الروس والمشهد مهول
واذكر اجساد اللي رضتهه الخيول بلا دفن فوق الثره مسجايه
وانظر الاكبر شبيه المصطفه راسه فوكـ رماحهه وتتخاطفه
العده ونور الوجه بالدم طفه والوصال بكربله مرمايه

وراس جسام من اشوفه عله الرمح يابو فاضل ينزف قلبي الجرح
ليش بثياب الزفاف وينذبح والكفوف من الدمه محنايه
وانظر لراس الرضيع وركبته والله اشوف الموت والله بنظرته
بين ادين حسين نبله الفطمته امي جودك ماسكاه من مايه
وانظر لراس الاخو روح البتول حسين واهنا نظرتي حتما تطول
راسه من راس الرمح تدري شيكول من الكهف يقره ويرتل ايه

من وكت نومه يضيغم بالطفوف جثه مسلوبه انكطع منه الكفوف
وانظر لراسكـ يعباس وشأشوف عينك بسهم العده مطفايه
والله وفيت بعهودك يالوفي ولو انوح الدهر هيهات اكتفي
تبقه لا والله لا ما تنطفي نارك التحت الضلع سرايه
يعباس وداعة الله معاودين خويه عنكم للمدينه مسافرين
والله ماادري شأكل لام البنين من تناشدني عله راعي الرايه

المرهون
02-16-2008, 07:22 PM
صوت الثغر

جف الحقد لمن وصل ثغر حسين ..... وينكـ يعباس
صوت العقيله وهذا صوت الجفين ..... وينكـ يعباس
هاك استمع صوت الثغر
كل العجب راسكـ صبر
وينكـ يعباس

وينكـ يسبع الكنطره للخوه انته المقياس
ظل العلم يم النهر والغيره ظلت بالراس
يضرب ثنايه ابن النبي وتشوفه وانته العباس
صح انته راس عله الرمح
لاسيف لاجف اليصح
بس غيرتكـ ويه الجرح
لو صاحت يصيح القدر ... وينكـ يعباس

ظالم يصيح ام الخدر يم راس اخوهه بغايه
وين اخوتج يابت علي خل تحضر الحمايه
وعيون ابو اليمه بزعل صدن لراعي الرايه
عباس اختنه بياوضع
تبجي ويعاتبنه الدمع
احاه يجف المنكطع
اسمع ينادي عله النهر ... وينكـ يعباس

بعدك يجفال الحرم غير الحزن ماعدهه
لاكن شجاعة حيدره بكل موقف تجسدهه
صرخه وتظل طول الدهر كل ثائر يردهه
لاكن اشد من اليسر
وكفتهه بين اهل الغدر
تميل ويتجيهه الصبر
وكل دمعة ترجمهه الدهر .... وينكـ يعباس

فزت يتيمه من الحلم ماتنوصف حالتهه
من جابو الراس بطشت وتلكته بدمعتهه
نامت عله الراس وبعد ماتنسمع ونتهه
هالطفله ماعادت تون
لاحسره لادمعه لجفن
لمن اجتهه ام الحزن
شافتهه ميته عله النحر ... وينكـ يعباس

يابه الفضل طبع الحرم بس للكفيل تنادي
طفله عله الراس انتهت طفله انتهت بالوادي
والحادي يضربهه بحقد جتال ابوهه الحادي
ظالم ولاهه بلا رحم
تمشي وتطيح من الام
كل نظره يا راعي العلم
احظر تصيح من الخطر ..... وينكـ يعباس

عيني عله عينكـ باليسر وعين الحسين لعينكـ
نظرة تمني لرايتكـ يابه الفضل بيمينكـ
يالنضرتكـ موت الخصم عن هالمصايب وينكـ
يالركبتني بمحملي
مهظومه ياضنوة علي
وينكـ ترجعني لهلي
من غيبتكـ ظهري انكسر ..... وينكـ يعباس

المرهون
02-16-2008, 07:24 PM
أنة السجاد

ليت القيود لها لسان محدث
تروي لنا ما قد خفى
من آنة السجاد
كم يشكو كم ..... يصبر وكم يروي اذا ..... نطق الألم
من أنة السجاد

نحر الشهيد المنذبح براس القناة ومرتفع
عيونكـ تشوفه ويا الدرب وكل نظرة تحنيلكـ ظلع
و يملكـ جفزن الصبر جا جزعن وصبن دمع
تبجي القيود وتلتوي من ونتكـ يالمنفجع
آه لجامعة الأذى لو اخبرت
من ذا الي قد اوثقت
في هذه الأصفاد
لتفصمت ..... وتحطمت جزعا له ..... وتبرأت
من أنة السجاد

جفينكـ البالجامعة عاشن تفاصيل الجرده
واتحسسن يوم الدفن ضلوع الحسين مكسره
وهنه الكفوف الدورن جفين سبع القنطره
والوسدن جسم الاخو الاكبر وصاله موذره
ويلي لتلكـ النائبات كأنها
جمعت بشخصكـ كلها
يازينة العباد
هاك الأسى ..... متكاملا خذ فيه درسا شاملا
من أنة السجاد

مرك هضم ما ينحسب والله انته قاموس الالم
شأحسب يبو الباقر شأعد وشجم جرح وشجم سهم
حالكـ واخوتكـ عالثره لو حالكـ بحرك الخيم
لو راس ابوك العالرمح او عالهزل حال الحرم
بلواك ماشهد الزمان مثالها
ونعيشها تبكي لها
والنار في الأكباد
تشهد لها ..... حسراتنا الامنا ..... ودموعنا
من أنة السجاد

ولكربله من عاودت لجابر يمولاي شكلت
وبالكعبه من غاب الوعي لأبن الثمالي شفصلت
ومن صادفكـ شاقي الذبح وهل الدمع شتذكرت
واحلف سهم نحر الطفل يصيبكـ اذا ماي شربت
كل المواقف عشتها وتعيشها
ونزيفها وانينها
لا لم يغب با زاد
وكأنما ..... تلكـ السما في كربلا ..... نزفت دما
من أنة السجاد

ويلاه اصيح بلا فكر لهالحاله واوكف منذهل
اذكر نهار اتلطعش موقف ابد ماينحمل
من لحدت كبر الابو ووسدته ودموعكـ تهل
تسمع خطاب من النحر وسد على صدري الطفل
عجباً لصدرك كالجبال ثباته
ولكربلا لمصابها
إهتزت اأوتاد
نبكي لها .... بحرارة بقلوبنا ..... ومرارة
من أنة السجاد

ثورة خطابكـ باليسر وي ثورة الطف خالده
كل جمله حجه عله البغي وعالنكرت الحكـ شاهده
وهذا الخطاب ويه الدهر ظل كل ضمير يردده
وانته الاسير المن هتف ذل عرش اميه وهدده
هل صادف التأريخ مثلكـ موثقاً
ذل الطغاة بخطبة
حين ارتقى الأعواد
قد ذلهم ..... وعروشهم وتدحرجت ..... تيجانهم
من أنة السجاد

المرهون
02-16-2008, 07:25 PM
ثورة بنت الكرار

ثورة وبالطف مولدهه وزينب صارت قائدهه ثورة بنت الكرار
دم المنحر فجرهه وضلع الكوثر مصدرهه ثورة بنت الكرار

راية محمد باليسر تحملهه
زينب شجاعة حيدره تمثلهه
وصبر الحسين وغيرة الكافلهه
هاي الذي محد يشاهد ظلهه
حانت ساعة ثورتهه تحيي المله ودمعتهه خطت نهج الاحرار
وتراب الطف شاهدهه وصوت حسين الخلدهه ثورة بنت الكرار

باقي الحسين وعاش عبره وعبره
ظنو نهاية ثورته بحز نحره
ماحسبو بعد الطفوف الثوره
نفس المخطط والنهج والفكره
هيبة حيدر هيبتهه صولة فارس جلمتهه كل دمعه تسل بتار
راس حسين يباريهه وجف عباس يحييهه ثورة بنت الكرار

ونة عليل وبين صرخة طفله
والمجلس وصوت الحقد مو سهله
كل هالمصايب ترجمتهه بصوله
اسست زينب بالضماير دوله
كد كيدك ناصب جهدك وشتكدر ضاعف جندك خصمكـ طه المختار
جنهه الزهره بخطبته وحروف الدم كتبتهه ثورة بنت الكرار

من وحده خلاهه الزمان لوحده
بس ثورة المظلوم اكثر شده
من وكفت بذاك الجمع تتحده
جيش انتفض كامل عدد والعده
صرخه وظلت للمحشر بوجه الظالم تتفجر كل جيل يصيح الثار
ثوره ودوم نجددهه والاحرار تأيدهه ثورة بنت الكرار

المرهون
02-16-2008, 07:25 PM
بالرأس جئنا

قد عدت والايتام تروي لكـ الالام
بلرأس جئنا سل اين كنا نروي لكـ الالام

ردت المهضومة زينب من اليسر للغاضرية
ردت وياها الضعينة لكبر ابن حامي الحمية
تكله ياعباس اخبرك بالجره عله الفاطمية
نطوف في البلدان ونجمع الأحزان
مذ عنكـ سرنا سل اين كنا نروي لكـ الالام

آنه زينب آنه زينب آنه ياخوية العقيلة
امي فاطمة الزجية والابو حامي دخيله
وهذا ضعن الهاشمية وانته يالباسل كفيله
انهض وردنه لوطنه يا ضوه كليبي ودليلة
من غربة البيداء من قسوة الأعداء
جئناك سلنا سل اين كنا نروي لكـ الالام

من هضم كلبي اعاتب يالوفيت بكل عهودك
تجاسرت والله الاعادي خويه من طيحة أزنودك
رايتكـ ذيج الرهيبة وهيبتي وعزي بوجودك
غابن بيوم الشريعة من بكيت انطر لجودك
ماكانت الامال في تلكم الاهوال
قد غبت عنا سل اين كنا نروي لكـ الالام

من طفوف الغاضرية خويه للكوفه انسبينه
عالهزل يبن الصميده بعاصمة حيدر مشينه
براسكـ يلوح حوله وتنتظر اطفال الضعينه
والاشد ينشدني شامت وينه راعي الرايه وينه
في مجلس الارجاس نسال عن العباس
ظلما شهدنا سل اين كنا نروي لكـ الالام

من سهم عينكـ ياذخري ماوسن مر إعله عيني
عكبكـ شراواني دهري وصابره واكتم ونيني
إبغربه واحزان ونوايب انتخي ومحد يجيني
استر لوجهي بشنالي واشكف السوط بيميني
حاطت بنا الاكدار والخوف والاخطار
واليوم عدنا سل اين كنا نروي لكـ الالام

المرهون
02-16-2008, 07:26 PM
يغايبنه

يغايبنه بخطر اصبح وضعنه .......... وغيابكـ فجعنه
الكـ يبن الحسن اخر دمعنه

اشهد بالضماير ماغبت موجود وتشوف المصايب
لاكن طلعتكـ غايتنه يالموعود مشتاكه الحبايب
لابد لليغيب من الغياب يعةد نتأمل يغايب
كالو هذي بدعه ولسه ماموجود نسمع هالعجايب
مايؤمن حسودك
ظل ينكر وجودك
اشكال بغيبتكـ شفنه وسمعنه
الكـ يبن الحسن اخر دمعنه

يغايب والجروح بشوفتكـ تلتم وترد الكرامه
الكـ تحله الفراسه وسيف الموزم وتلوك الزعامه
يمهدينه وضريح العسكري تهدم صار شجم علامه
بقه بنفس الحقد جف السكاه السم عاود بانتقامه
وتنوح المناره
تكفيكـ الاشاره
تنادي ابين عدوانكـ وكعنه
الكـ يبن الحسن اخر دمعنه

بقينه عله الوعد ونجمع الاخبار صارت بينه حاله
مثل البالسفينه وهاجمه الاعصار والحوت اعتناله
مابين البحر والحوت محتار والموت احتماله
ايس لامفر من حاطته الاخطار يبعثلكـ رساله
يصيح لثارك تكوم
يبن المصطفه اليوم
وكت الموزمه تفرق جمعنه
الكـ يبن الحسن اخر دمعنه

شفت ساعه ظهورك نحسبلهه حساب عنوان وقضيه
ثاراتكـ نصيح وكل دليل انصاب نذكر يارزيه
اول ثار الكـ من طبرة المحراب لو بالغاضرية
لو بأول مصيبه وتبتدي من الباب وبضلع الزجيه
بيدك ياذخرهه
خل يجبر كسرهه
من يوم الضلع ماخف وجعنه
الكـ يبن الحسن اخر دمعنه

متى هلال الفرج ونشوفه يالمحجوب وانودع حزنه
الكـ شابح نظرنه بلهفة المصيوب يا اخر املنه
صفت غايه الحياه وغالب ومغلوب وي قلة عددنه
مكتوب انتظارك والحزب مكتوب مانخلف عهدنه
نصيح بكل قناعه
الكـ سمعا وطاعه
جزع حته الصبر بس ماجزعنه
الكـ يبن الحسن اخر دمعنه

المرهون
02-16-2008, 07:33 PM
واحسيناه

تسيل كل دمعه عله خدودي وتصيح
واحسيناه ..... واحسيناه ..... واحسيناه
في تحدي ..... هالك عهدي
واحسيناه ..... واحسيناه

انته منهاج الاراده ويه السنين ..... وبسمكـ الدين انتظامه
وانته يابو اليمه شمس الخالدين ..... والفرض حبكـ تمامه
ثوره دمكـ يانشيد الثائرين ..... يادروس من الكرامه
وانته انته البالحشر حصني الحصين ..... ياملاذي بالقيامه
صوت جفي من يدق صدري الجريح
واحسيناه ..... واحسيناه ..... واحسيناه
للوفاء ..... خذ ندائي
واحسيناه ..... واحسيناه

سيدي تتواله ازمان ودهور ..... والله ماننسه مصابكـ
وكل جبين يعفره ترابكـ فخور ..... وياخذ العز من ترابكـ
يالبنيت المله من فيض النحور ..... شيدتهه بدم خضابكـ
من تلوح الكبه احس دمكـ يفور ...... يللي باب الجنه بابكـ
وكل كياني يصيح لو شفت الضريح
واحسيناه ..... واحسيناه ..... واحسيناه
بل أنادي ..... من فؤادي
واحسيناه ..... واحسيناه

تنصهر اجسادنه بنار وحديد ..... الموت عنكـ مامنعنه
حروف اسمكـ تمشي وي دم الوريد..... والله لو باسمكـ سمعنه
نحبكـ وهذا الطبع بينه ويزيد ..... والله مانترك طبعنه
مصابكـ بكل عام يرجع من جديد ..... ولانشف لأجلكـ دمعنه
نصيح واويلاه ياضامي وذبيح
واحسيناه ..... واحسيناه ..... واحسيناه
يا غريبا ..... يا سليبا
واحسيناه ..... واحسيناه

احنه عنكـ مانميل ومستحيل ..... سيدي نزل ونعوفكـ
سرنه وياك بدرب كلش طويل ..... يبتدي بثورة طفوفكـ
ونبقه عالمنهج بين حامي الدخيل ..... للحشر لمن نشوفكـ
شما تجور عداك عنكـ لابديل ..... وتنكتب بالدم حروفكـ
هالك بيعتنه بشكل واضح صريح
واحسيناه ..... واحسيناه ..... واحسيناه
لانخادع ..... اذ نبايع
واحسيناه ..... واحسيناه

يوم طاح الاكبر ابين الصفوف ..... شكبره يابو اليمه صبرك
من شفت عباس مكطوع الجفوف ..... ومن اجيت ومحني ظهرك
يالوحيد ودارت عليكـ الالوف ..... يللي درع المله صدرك
نحرك انته اللي ذبح ذيج السيوف ..... ثبت الاسلام نحرك
يالصفيت مهشم ضلوع وطريح
واحسيناه ..... واحسيناه ..... واحسيناه
قلبي دامي ..... يا امامي
واحسيناه ..... واحسيناه

آه يا من صدرك ترضه الخيول ..... آه ياشبل الزجيه
مادرت صدرك صدر طه الرسول ..... مادرت خيل آل اميه
ياصرح عز وثبت ويه الاصول ..... ياشهيد الغاضريه
مادروا يحسين نورك مايزول ..... لموعد الطلعه البهيه
وبيرغ الثارات عالي ومايطيح
واحسيناه ..... واحسيناه ..... واحسيناه
خذ شعاري ..... بل قراري
واحسيناه ..... واحسيناه


أحبتي عشاق الحسين ع أتمنى ذكر المصدر عند نقل القصائد
منتديات عشاق الحسين

موفقين جميعاً ونسألكم الدعاء
:)

عيسى
02-18-2008, 04:40 PM
بسم الله الرحمن الرحيم

اللهم صلي على محمد وال محمد

الشكر الجزيل أخي المرهون على وضع ا لقصائد مكتوبة وهذا من سروري أن أرى النشاط المميز منك أخي في هذا المنتدى الحسيني وأتمنى مواصلة هذا الجهد المبارك ان شاء الله


فكرة رائعة أن نرى القصائد مكتوبة مع كل اصدار للملا باسم حفظه الله

بارك الله فيك أخي العزيز وحشرك الله مع أنصار الحسين عليه السلام

أخو
عيسى